v ජයග්‍රහණය සදහා ගත් වෙහෙස.

“ජාතික ජන බලවේගය” පසු ගිය මැතිවරණ වලදී ලබා ගත් අති විශාල ජයග්‍රහණය වෙනුවෙන් වෙහෙස දැරූ, මුදල් වැය කලා වූ, කාලය හා දැනුම බෙදා ගැනීමෙන් දායක වූ විශාල පිරිසක් අප අතර සිටිති. ඔවුන් අතරින් සමහරෙක් සහාය දුන්නේ විදෙස් ගතව සිටිමිනි. මේ සියල්ලෝ අදටත් තමන් ගත් තීරණය ගැන ආඩම්බර වෙනවා නිසැකය.

 මේ හැමෝම ජා.ජ.බ. නැමති දේශපාලන ව්‍යාපාරයේ උපත සහ එහි විකාශනය පිලිබදව අවබෝධයක් තමන් සතුව ඇත්දැයි මම නොදනිමි.

එම අතීතය දන්නා කෙනෙක් එම තොරතුරු සැම දෙනාගේ අවබෝධය සදහා බෙදා ගන්නේ නම්, එය ඉතා ප්‍රයෝජනවත් වනවා නොවනු මානය. එම ඉතිහාසය පිලිබදව දැනුවත්වීම එහි අනාගත වර්ධනය සදහා ඉතා වැදගත් යයි මම සිතමි.

 v ජා.ජ.බ. ආරම්භක අරමුණ.

මම දන්නා තරමට එම උපත ලැබුවේ ජනතා විමුක්ති පෙරමුණ තුලයි. එහි ආරම්භය සදහා ජේවීපීය විවිධ පුද්ගලයන් සහ ජනතා සංවිධාන නියෝජිතයින් සමග මුලික සාකච්ඡා වට ගණනාවක් පැවැත්වූ බව මම දනිමි. එහි ප්‍රතිපලයක් වශයෙන් සංවිධාන 20 පමණ එක්ව ජා.ජ.බ. උපත ලැබූහ.    

 එහි උපත ගැන සිතන කොට මගේ මතකය ඇදී යන්නේ ජාතික ජන බලවේගය විසින් පැවැත්වූ ආරම්භක මහා රැස්වීමක් වෙතයි. එය පැවැත්වුයේ බණ්ඩාරනායක සම්මන්ත්‍රණ ශාලාවේදී යි. එම අවස්ථාවේ දී අනුර කුමාර දිසානායක මහතා පැවත් වූ කතාවේ කොටසක් මගේ සිතේ රැඳී තිබේ. එතුමා මෙවන් අදහසක් ප්‍රකාශ කලා.     

 “ලාංකික සමාජය තුල වෙනසක් ඇති කිරීමට බොහෝ අය කටයුතු කරනවා. එම අරමුණට ඒ හැමෝම එකට එක්ව යාමට ජාතික ජන බලවේගය තුල අවකාශයක් නිර්මාණය කිරීම වැදගත්”. එම අදහස සමග ජා.ජ.බ බිහිවීම, දූශිතයන් පරාජය කිරීම හා ජා.ජ.බ ලැබූ ජයග්‍රහණය ගැන විශාල සතුටක්. ජේවීපීය එවැනි සංකල්පයකට පණ දීම අගය කල යුතුයි.

 v ජේවීපී නොවන මාලිමාවේ බහුතරය.  

පසුගිය සිද්ධි මාලාව ගැන බලන කොට කාටත් පැහැදිලි එක් දෙයක් නම් ජා.ජ.බ බලයට ගෙන එන්න කැපවු විශාල පිරිස ජයග්‍රහණයෙන් පසුව හෝ ජෙවීපී එකේ සාමාජිකත්වය ලබා නොගැනීමයි. ජේවීපී යෙන් හෝ අන් අයට ජේවීපී වන්නට කැදවීමක් නොතිබුණි.      

 ජේවීපී නොවන සෙසු අය රටේ පාලනය සදහා ජා.ජ.බ තෝරා ගෙන සහ අනුර ගේ නායකත්වය පිළිගෙන සන්ධාන ගතව, ජා.ජ.බ ආණ්ඩුවේ කොටස් කරුවන් වී, තම තමන්ගේ අනන්‍යතාවයන් සමග ජා.ජ.බ තුල ක්‍රියා කරති.

දෙගොල්ලම ස්වාධීනව කටයුතු කරන්නට තීරණය කරන්නේ, තම තමන්ට ආවෙනිකවූ දර්ශනයන්, දුත කාර්යන්  සහ ක්‍රම වේදයන් තිබූ බව තේරුම් ගත් බැවිනි.  

 v ජේවීපී නොවන ජා.ජ.බ බහුතරය

නමුත්, ජා.ජ.බ බහුතරය ජේවීපී නොවන පිරිස අසංවිධාත්මකයි. තමන්ගේ අනන්‍යතාවය අනුව තම දූත මෙහෙවර පිලිබදව සංවේදීතාවයකින් ක්‍රියාකරන බවක් දකින්නට නැත. තමන්ට ආවේනික වූ වගකීම් හඳුනාගෙන, ක්‍රියාත්මක කරමින්, එම දේශපාලනයේ අභියෝග ජය ගන්නට සාමුහික ක්‍රියාකාරිත්වයක් ඔවුන් තුල නැත. 

 කෙසේ වෙතත් මොවුහු බොහෝ දෙනෙක් උගත්, අත්දැකීම් ඇති පිරිසකි. රටේ අනාගතය පිලිබදව දැක්මක් ඇති පිරිසකි. ඔවුන්ට ඇත්තේ වෙනම අනන්‍යතාවයකි. අනුගමනය කරන්නේ ඔවුන්ට ආවේනිකවූ ක්‍රමවේදයන්ය. ඔව්හු සහභාගිත්වයේ ක්‍රමවේදය වඩා ප්‍රියකරති. Top down ක්‍රමවේදය ප්‍රතික්ෂේප කරයි.

මෙලෙස අනන්‍යතාවයන් දෙකක් මතුවී ඇති බැවින් ජේවීපී සහ නොවන කොටස් දෙක අතර ගැටළුවක් පවතී. සෑහෙන පිරිසකට දැන් එම තත්වය දැනෙන්නට පටන් ගෙන තිබේ.                      

එ් නිසා ජාතික ජන බලවේගයේ ආණ්ඩුවට බොහෝ පිරිසකගේ නිර්මාණශීලී දායකත්වය අහිමි වෙමින් පවතී. ආණ්ඩුවට බහුතරයේ   පෝෂණය නොලැබී යයි. ජා.ජ.බ. එම පිරිසගේ ක්‍රියාකාරී දායකත්වය ලබා ගැනීමට ක්‍රමවේදයක් ද නැත. එම තත්වය යටතේ පොදු විපක්ෂය වාසි ලබයි.

බහුතරය පාලනයට හවුල් කර නොගන්නේ නම්, ප්‍රතිඵත්ති සැකසීමේදී සහ තීන්දු තීරණ ගන්නා විටදී ඔවුන්ව නොතකා හරින්නේ නම් සහ බලවත් පාර්ශය විසින් ඔවුන්ව මග හැර යන්නේ නම්, එක් අතකින් ආණ්ඩුව එම බහුතරය නිකමුන් බවට පත්කරයි. ආණ්ඩුවක් යම් ජන කොටසක් නිකමුන් කරන්නේ නම් එය බරපතල වරදක් වනු ඇත. එය මනුෂ්‍යත්වයට කරණ නිගාවකි. අනුර කුමාරගේ “පුනරුද” දැක්මට එරෙහි වීමකි. එබැවින් ආණ්ඩුවේ වගකීම වන්නේ ජනතාවගේ නිර්මාණ ශක්තීන් ගොඩ නැගෙන වාතාවරණයක් සැකසීමය. 

අනික් අතට එයින් සිදු වන්නේ ඔවුන් ජා.ජ.බ බලවත් පාර්ශවයේ යටත් වැසි පිරිසක් බවට පත් වේ. තවද, පාලකයින් ඉබේටම ප්‍රභූ පංතියක් බවට පත්වනු ඇත. එයින් සිදුවන්නේ බහුතරය තුල කලකිරීම් ඇති වීමයි. එම තත්වය රටට ඉතාමත් අවාසි සහගතය. එවිට ලැබූ එම ජයග්‍රහණය නඩත්තු කරන්නේ කව්ද?

අද වෙනකොට ග්‍රාමීය මට්ටමේ කිසියම් ජනතා ස්ථීර ක්රියාකාරිත්වයක් තිබේද? කොට්ටාස සභාවල තත්වය කුමක්ද? “සමුපාකාර” චන්දය ජය ගන්නවා හැරෙන්නට ග්‍රාමීය සංවර්ධනය සදහා ඉදිරි වැඩ පිළිවෙලක් සදහා ආරම්භයක ලකුණු ඔබ දකීද? ඒ සදහා ඉහලින් නිර්දේශ නොමැති නිසා ජනතා ක්‍රියාකාරිත්වයන් ඇනහිට ඇත.

v වෙනසක් අවශ්යවේ.   

අද සිදුවිය යුතු කාරණා කීපයක් අප ඉදිරියේ ඇත. ජා.ජ.බ සම්බන්ධ විවිධ කොටස් තමන්ගේ එකිනෙකාගේ අනන්‍යතාවය නිශ්චිත කර ගත යුතුවේ. සියලු දෙනා අනිකාගේ අනන්‍යතාවය පිළිගෙන ඊට ගරුකිරීම

සහ හදුනාගත් සීමාවන් තුල සිටිමින් පොදු අරමුණ සදහා ක්‍රියාකිරීමට ඉඩ සැලසිය යුතුය. සියලු දෙනා පොදු අරමුණ තකා තමන්ට පරිත්‍යාග කිරීම සුදානම් විය යුතුය. ජා.ජ.බ. සන්ධානයක් වන්නේ එවිටය.

එහි ආරම්භක අරමුණට විශ්වාසවන්ත වන්නේ එවිටය. එවන් තත්වයක් උදා කරගන්න ජා.ජ.බ. බලයට ගෙන එන්න වෙහෙසවූ අයම ඉදිරිපත් විය යුතුය.